Lady Gaga: Si dola nga depresioni

Lady Gaga rrëfen periudhën e vështirë të depresionit që kaloi në fund të 2013-s. Në një intervistë për “Harper Bazaar”, këngëtarja thotë se vendosi të reagojë me ardhjen e 2014-s dhe gjeti mënyrën për të dalë nga dëshpërimi.

“Në fund të vitit 2013, isha bërë tejet depresive. E rraskapitur nga lufta me njerëzit, nuk mund të ndjeja as të rrahurat e zemrës sime. Isha e zemëruar dhe cinike dhe ndjeja një pikëllim të thellë. Thjesht, sikur isha ndalur së luftuari. Por më 1 janar jam zgjuar, kam qarë, e kam shikuar veten në pasqyrë dhe kam thënë: ‘e di se nuk dëshiron të luftosh. E di se nuk mundesh, por e ke bërë këtë edhe më parë. E di se është e dhimbshme, por këtë depresion nuk mund ta mbijetosh në këtë mënyrë’”, ka zbuluar Gaga në këtë intervistë.

“Vërtetë ndjeja se po vdisja, sikur po shuhesha ngadalë. Por pastaj vetvetes i kam thënë se duhet të luftoj. Për shkakun e vetes, për muzikën, për fansat, për familjen. Depresioni nuk ta merr talentin, por e bën të vështirë ta gjesh. Por gjithmonë e gjen disi. Pikëllimi nuk mund të rrënojë atë të mirën në mua. E kam gjetur atë copëz të vogël të dritës”, ka përfunduar ajo.