Thirrje për çlirimin e "Epiri i Veriut” (VIDEO)

“Para 100-vjetësh paraardhësit tanë vepruan, sot ne çfarë bëjmë. Skllav është ai që pret ta çlirojnë të tjerët.”

Këto janë disa nga fletushkat në gjuhën greke me thirrje antishqiptare të shpërndara nga komiteti qendror “Vorio Epir 1914" në Himarë.

Fletushkat në gjuhën greke me thirrjet antishqiptare dhe me foton e kryesisë së fshatit janë shpërndarë në çdo cep të Himarës.

Ndërkohë, policia ka bërë të mundur shoqërimin e një personi të dyshuar.

Filip Nestur Dhimojani, 28 vjeç është vënë në pranga. Policia ka sekuestruar dhe mjetin e tij me targa greke, raporton "shqiptarja.com".

Policia ka nisur hetimet por nuk ka dhënë asnjë version zyrtar mbi incidentin. 

Përfaqësues të Partisë, Agimi i Artë në Greqi vazhdimisht kanë shprehur qëndrimin se, me ardhjen e tyre në pushtet, Greqia do të çlirojë pjesën e territorit të saj që ndodhet brenda kufirit të Shqipërisë.

“Epiri i Veriut”

Në vitin 1914, ajo pjesë e Shqipërisë që Greqia e quan “Epiri i Veriut”, refuzoi t’i bashkohej Shqipërisë duke deklaruar pavarësinë në Gjirokastër dhe formoi qeverinë e saj.

Protokolli i Korfuzit, i cili u firmos nga Shqipëria dhe qeveria e përkohshme e “Epirit të Veriut”, njihte zyrtarisht “Epirin e Veriut” si njësi autonome vetëqeverisëse nën sovranitetin dhe principet e Shqipërisë. Kjo marrëveshje i jepte në një farë mënyrë autonomi brenda territorit të Shqipërisë kësaj pjesë të territorit të Shqipërisë. 

Kjo ndodhi pas përfundimi të Luftës së Ballkanit, por protokolli nuk u zbatua asnjëherë për shkak të paqëndrueshmërisë politikë në Shqipëri. Ndërsa, anulimi i protokollit u bë zyrtarisht në vitin 1921 gjatë Konferencës së Ambasadorëve.