INDONEZI – John Kerry viziton xhaminë më të madhe të Azisë Juglindore (FOTO/VIDEO)

XHAKARTË, 16 shkurt /ATSH-AFP/ - Sekretari amerikan i Shtetit, John Kerry, në turne në Azi, shkoi sot në xhaminë më të madhe të Azisë Juglindore, në Xhakartë, në shenjë respekti ndaj islamit në vendin me popullsinë më të  madhe myslimane në botë.

Pasi hoqi këpucët përpara xhamisë Istiqlal në qendër të kryeqytetit indonezian, Kerry përshkoi ndërtesën gjigante, i shoqëruar nga imami i madh Kyai al-Hajj Ali Mustafa Yaqub.

Duke e cilësuar një vend të jashtëzakonshëm, shefi i diplomacisë amerikane deklaroi për shtypin: “e konsideroj privilegj të jesh këtu dhe i jam shumë mirënjohës imamit që më lejoi të vija”.

Administrata Obama po përpiqet të riparojë dëmet e shkaktuara në marrëdhëniet mes Shteteve të Bashkuara dhe myslimanëve që prej fillimit të viteve 2000.

Uashingtoni dhe disa vende të tjera perëndimore e kanë cilësuar shpesh Indonezinë si “urë” mes tyre dhe botës myslimane.

Edhe presidenti amerikan Barak Obama, i cili ka kaluar një pjesë të fëmjërisë në Xhakartë, ka shkuar në këtë xhami gjatë një vizite në vitin 2010.

Për ndërtimin e xhamisë Istiqlal, e porositur në vitin 1961 nga lideri i asaj kohe, Sukarno, janë dashur 17 vjet. Ajo mund të presë deri 130 000 besimtarë gjatë Ramazanit.

Gjatë ditës, sekretari amerikan i Shtetit i bëri thirrje komunitetit ndërkombëtar për të shtuar përpjekjet kundër ndryshimit të klimës.

Kerry pritet të takohet sot në mbrëmje me ministrin e Jashtëm indonezian Marty Natalegawa dhe me presidentin Susilo Bambang Yudhoyono.