Maqedonia akuzohet për krime të frymëzuara nga urrejtja etnike

Autoritetet maqedonase po shpërfillin krimet e frymëzuara nga urrejtja etnike, njofton Komiteti Lokal i Helsinkit për të Drejtat e Njeriut në një raport të fundit, shkruan “BalkanInsight”.

Më tepër se 80% e sulmeve nga urrejtja “përfshinin maqedonas dhe shqiptarë etnikë”, thuhet në raport. Orientimi seksual dhe identiteti gjinor ishin shkaqe që qëndronin pas 9% të sulmeve, ndërsa besimi fetar ishte shkak për 7% të tyre.

Sipas raportit, shumica e incidenteve kanë ndodhur në kryeqytet, në Shkup dhe në pjesën perëndimore të vendit, të përziera nga pikëpamja etnike, në Tetovë, Gostivar, Strugë dhe Kumanovë. Raporti theksoi se 72% e incidenteve për shkak të urrejtjes kanë ndodhur në Shkup.

Po ashtu, thuhet se vitin e shkuar policia arrestoi dhunuesit për vetëm 27 raste krimesh të urrejtjes dhe vetëm një rast sulmi ndaj qendrës LGBT në Shkup u paraqit në gjyq.

“Është për t’u shqetësuar që autoritetet qëndrojnë të heshtura përballë dhunës etnike. Këto krime, ose nuk raportohen, ose policia nuk i heton ato në mënyrën e duhur”, tha kryetarja e Komitetit të Helsinkit, Uranija Pirovska.

Pirovska tha se ka një prirje institucionale për t’i kamufluar krimet e urrejejtes si akte të zakonshme dhune, të cilat nuk dënohen aq ashpër me ligj. Ata kanë krijuar një tablo të pasaktë mbi atë që po ndodh, shtoi ajo.

Në raportin e fundit për krimet e urrejtjes etnike, Komiteti i Helsinkit raportoi 116 incidente të tilla gjatë vitit 2013