Terim: UEFA dhe FIFA duhet ta njohin Kosovën

Fatih Terim, trajner i Kombëtares së Turqisë, mendon se miqësorja me Kosovën është mesazh më i mirë që FIFA dhe UEFA ta pranojnë Kosovën. Turqia sot në ‘Adem Jashari’ mundi Kosovën me rezultat 1-6, në ndeshjen miqësore ndërkombëtare. Tekniku turk duke folur për mediat turke tha se këtë ndeshje duhet shikuar në shumë aspekte.

“Këtë ndeshje mund ta shohim nga shumë aspekte. Aspekti i parë është se po e njohim Kosovën si shtet. Se Kosovën duhet ta njoh edhe UEFA e FIFA. Arsyeja që kemi ardhur këtu është që ta japim këtë mesazh”, ka thënë Terim, transmeton RTK.

“Tash e tutje, do t’i ndihmojmë kosovarët në asketin e edukimit të futbollit. Sa i përket ndeshjes, nuk ka për t’u folur shumë. Ishte një rast i mirë për t’i parë disa futbollistë, të cilët kanë treguar lojë të mirë”, tha Terim.

Strategu turk ishte i emocionuar kur në tribunat e stadiumit ‘Adem Jashari’ pa disa tifozë kosovarë me helmeta minatorësh, duke ndarë dhimbjen e tyre me popullin turk pas tragjedisë në minierën e Somas. /RTK/Telegrafi/