Vota juaj mund ta ndihmojë shqiptaren Zerina Derveni të shpallet «Miss Universe Canada 2014» (Video)

Intervistë për «dialoplus» me kandidaten për «Miss Universe Canada 2014», Zerina Derveni

Në faqen zyrtare të Miss Universe Kanada, ajo është konsideruar si një nga 20 vajzat më të bukura të Universit. Është e lindur në Shkodër dhe është larguar nga Shqipëria kur ishte e vogël. Ka jetuar në Gjermani në Frankfurt. Kur ishte shtatë vjeçe është larguar nga Gjermania për të shkuar në Kanada me familjen e saj. I pëlqen shumë të luaj volejboll. Po afrohet data 22 maj ( e enjte) kur do të garoj për kurorën e «Miss Universe Canada 2014». Për më shumë do të mësojmë nga kjo intervistë.

Vota juaj :   http://missuniversecanada.ca/vote-for-your-favorite/

Zerina, Ju falënderoj për kohën që ia kushtuat kësaj interviste. Fillimisht, a mund të na thoni kush ishte ai apo ajo që ju nxiti të konkurroni për «Miss Universe Canada 2014»?

Kam aplikuar për «Miss Universe Kanada» në shtator 2013, me shpresën për të qenë një model pozitiv i aftësive femërore, jo vetëm për bukurinë e saj, por edhe inteligjencën dhe forcën e femrës për të ecur në jetë. Të isha një model nxitjeje për femrat e reja, për ta shfrytëzuar çdo aftësi që ua ka dhënë Perëndia në rolin e tyre të pazëvendësueshëm në jetë. Të jesh femër, grua e nënë në të ardhmen është një privilegj i bukur. Pas shumë intervistave dhe provave diskualifikuese, më lajmëruan në shkurt 2014 se unë ishte një finaliste për «Miss Universe Canada 2014».

Meqë sigurisht jo të gjithë lexuesit tanë Ju njohin, a mund të na thoni nëse jeni më shumë e Shkodrës, e Gjermanisë apo e Kanadasë, pasi ke lindur në Shkodër, ke jetuar në Gjermani, e tash në Kanada?

Unë kam lindur në Shkodër dhe jam larguar nga Shqipëria kur isha një vjeç e gjysmë, pra shumë e vogël. U zhvendosëm në Gjermani për 5 vjet dhe tani jetojmë në Kanada, plot 17 vjet. Unë e konsideroj veten shqiptaro-kanadeze. Kam nënshtetësi kanadeze, por gjaku im është shqiptar. I kam të dy prindërit shqiptarë, nënën nga Shkodra, kurse babanë nga Fieri. Dy prindër që do t’i ëndërronte çdokush në jetë si prindër perfekt. Ata janë inspirimi, mbështetja dhe shtysa ime në jetë për t’i arritur qëllimet e mia.

Prej sa anëtarëve përbëhet familja juaj?

Familja ime përbëhet nga babai, nëna dhe vëllai, që është dy vjet më i madh se unë.

Sa vite keni qëndruar në Gjermani dhe a ke provuar atje për të konkurruar në ndonjë spektakël bukurie?

Kam jetuar në Gjermani në Frankfurt vetëm 5 vjet, d.m.th. isha e vogël 7 vjeç kur jam larguar nga Gjermania për të shkuar në Kanada me familjen time.

Kur keni ardhur në Kanada?

Në Kanada kemi ardhur në vitin 1997.

T’i kthehemi spektaklit «Miss Universe Canada», në të cilin do të konkurroni. Jeni finaliste dhe jeni konsideruar njëra nga 20 vajzat më të bukura të Universit. Mendoni se do ta fitoni kurorën e më të bukurës?

Të vlerësohesh ndër 20 vajzat më të bukura të Universit është një kompliment për mua. Bukuria është relative dhe unë mendoj se bukuria e jashtme është diçka sipërfaqësore në qoftë se ajo nuk gërshetohet me bukurinë e brendshme, atë shpirtërore. Ajo që do të më ndihmojë më shumë mua në këtë kompeticion them se do të jetë edhe fusha ime e arsimimit si një studente me rezultate të shkëlqyeshme në mësime dhe në të menduarit tim pozitiv për njerëzit e për jetë. Ky do të jetë një avantazh që do të më ndihmojë mua të mund të jem ndër më të bukurat për ta fituar kurorën e «Miss Universe Canada», e jo domosdoshmërisht bukuria. Atë e ka falë Zoti. Juria dhe njerëzit votojnë në kompleks për një miss, e jo vetëm për bukurinë e saj, por edhe inteligjencën, arsimimin, thjeshtësinë e marrëdhëniet që ka me njerëzit. Të jesh ‘miss’ nuk është vetëm një privilegj, por edhe sipërmarrje jo e vogël për ta mbajtur me dinjitet titullin «Miss Universe».

Si ju ka pritur komuniteti shqiptar në Kanada?

Komuniteti im shqiptar në Kanada ka qenë shumë mbështetës dhe inkurajues. Gjithashtu, edhe komuniteti në Shqipëri ka qenë super përkrahës. Unë jam aq mirënjohës për të gjithë ata që kanë votuar në internet për mua, që më kanë shkruar këtë kohë, që më kanë telefonuar e inkurajuar që ta vazhdoj rrugën e nisur. Kjo iniciativë imja më ka bërë mua që të njoh njerëz të rinj e të mahnitshëm që më mbështetin mua çdo ditë duke harxhuar pak nga dita e tyre për të qenë mbështetës për mua. Ata dhe familja ime janë inspirimi im për t’ia dalë mbanë me gjithë impenjimet e mia të shumta.

Nëse do të zgjidheni e para, kujt do t’ia dedikoni kurorën?

Nëse fitoj, kurorën time unë do t’ua kushtoj të gjithë qytetarëve shqiptarë rreth botës që më kanë dhënë kurajë dhe mbështetje të bëhem fituese, sepse ne jemi një komunitet i fortë dhe shumë përkrahës për njerëzit tanë. Kjo do të ishte një nder për mua, për ta ndarë këtë përvojë fitoreje me të gjithë shqiptarët kudo në botë.

Si ju ka pritur organizatori i këtij spektakli të bukurisë?

Organizata «Miss Universe Canada» është aq e dobishme dhe inkurajuese gjatë gjithë procesit. Duhet t’i falënderoj për këtë, pasi ndihem shumë mirë në këtë garë.

Keni folur me konkurrentet tua për Shqipërinë?

Po, kam folur për vendin tim, për bukuritë e Shqipërisë, për njerëzit atje qe janë shumë të dashur e miqësorë me të huajt, për fëmijërinë time. Por, gjithashtu jam krenuar se prejardhja ime është shqiptare, e unë vij nga vendi që e lindi të madhen, të mirën, humanisten Nënë Terezën, një grua e jashtëzakonshme e me zemër të madhe, një ikone që mundohem sadopak t’i ngjaj, vendi i origjinës së Fadil Berisha (fotograf), James John Belushit (vëllezërit aktorë e këngëtarë), Eliza Dushkut (aktore), Stan Dragoti (regjisor), Ferid Muratit (nobelist që e fitoi çmimin Nobel në mjekësi më 1998), Emina Çunmulajt (modele njohur në SHBA), James Biberi e shumë e shumë njerëzve që kanë bërë emër kudo në botë në fushën e tyre të artit e të biznesit, e me gjerë. Krenohem me shqiptarët dhe punën e tyre të palodhshme.

Sa janë të njohura ato për Shqipërinë? E për Kosovën dhe tokat shqiptare?

Ato nuk i njohin shumë Shqipërinë dhe Kosovën. Disa as nuk e dinë se ku janë ato në hartë. Por, unë po përpiqem dhe dua të jem si një ambasadore për t’i përcjell më të mirat e vendit tim në sytë e tyre. Është me të vërtetë e rëndësishme për mua për të folur shumë për Shqipërinë dhe për Kosovën, për ta bërë një prezantim të mirë, e kjo edhe për ta ndihmuar në fushën e turizmit Shqipërinë për t’u krenuar me virgjërinë dhe bukurinë e viseve shqiptare. Shqipëria e Kosova janë vendet që meritojnë mirënjohje dhe admirim e respekt dhe duhen vizituar nga të huajt.

Është e dashuruarZerina? Nëse jo, prej cilit vend do të kishe dashur ta kesh të dashurin, e kam fjalën për trevat shqiptare, nga Shqipëria, Kosova, Maqedonia, Ulqini apo nga Lugina e Preshevës?

Ah, akoma nuk ka ardhur ai moment në jetën time. Unë jam e përkushtuar shumë me studimet dhe aftësimin tim në fushën e biznesit dhe komunikimit me publikun. Për mua ka rëndësi njeriu, e jo vendi nga do ta zgjedh personin që do të më bëjë të lumtur. Ajo do të vijë në mënyrë të natyrshme një ditë kur unë të impenjohem më shumë në këtë aspekt. Tani primare në jetë për mua është realizimi im si femër e pavarur, të tjerat do të vijnë në kohën e duhur.

Në një intervistë ke thënë se dëshiron ta fitosh këtë edicion të ‘miss’-it dhe të bëhesh një farë ambasadoreje ndryshe e Shqipërisë. Komenti juaj?

Për të qenë në gjendje për ta përfaqësuar vendin tim në sytë e botës si një ambasadore e bukurisë, por edhe e zgjuarsisë dhe profesionalizmit në biznes dhe si një ndikim mbi qytetarët e mbarë botës për rolin që ka femra në shoqëri për t’i parë gjërat me pozivitet. Kjo është një ëndërr imja dhe një nder shumë i madh që t’i përngjaj, qoftë edhe pak ishullit tim, Nënë Tereza.

Na thoni drejt, ju vjen më lehtë të flisni në gjuhën shqipe, në atë angleze apo gjermane?

Unë mund të flas shqip mirë në dialektin shkodran dhe rrjedhshëm në anglisht. Meqë e kam pjesë nga familja ende në Gjermani, unë ende e kujtoj atë gjuhë kur i vizitoj, por është e vështirë për mua të flas rrjedhshëm në gjuhën gjermane.

Në anën tjetër, jeni marrë edhe me dramë. Na flisni shkurtimisht se çfarë në rolesh ke luajtur?

Jam marrë me dramë në shkollë dhe kjo ishte një përvojë e bukur për mua që të ushtrohesha si amatore. Nuk ishte asgjë serioze, por vetëm diçka që ishte emocionuese për mua dhe më jepte kënaqësi.

Ku do ta shohim Zerinën pas këtij spektakli?

Unë dua që përfundimisht të punoj për një biznes në ndonjë korporatë të menaxhimit. Unë shpresoj që përfundimisht të jem një sipërmarrëse femër me një karrierë të respektuar. Kjo do shumë punë dhe përkushtim, si dhe aftësi profesionale. Kjo është ëndrra ime e vërtetë.

Kush është ai apo ajo që ju ka pagëzuar me këtë emër?

Një mik i babait tim ma ka dhënë këtë emër. Me sa duket, e ka marrë nga një gazetare e njohur në Shqipëri, e cila është quajtur Zerina Kuke.

Dëshira juaj më e madhe për momentin, pa menduar shumë?

Për ta bërë një ndryshim pozitiv në komunitetet, duke ndihmuar gratë e reja t’i arritur ëndrrat e tyre.

Luan edhe futboll e volejboll. Cili është sporti yt më i preferuar?

Më pëlqen shumë të luaj volejboll në plazh, të rrezohem e të bëhem njësh me rërën. Të notoj në det. Velipoja, Vlora e Saranda, si dhe gjithë bregdeti shqiptar janë të mahnitshëm.

Keni diplomuar në Degën e Drejtësisë dhe Shoqërisë. Na thoni, ku e keni kryer shkollimin?Jeni modeste?

Unë e kam një diplomë në Drejtësi dhe Shoqëri në «York University» dhe unë kam dy zotërinj në «Corporate Communications» dhe «Biznes Menaxhim». Besoj se unë jam shumë modeste, një vajzë shumë e thjeshtë, pasi rrjedh nga një familje e thjeshtë shqiptare. Për mua, thjeshtësia është vlerë e patjetërsueshme. Studimet e mia universitare në Drejtësi dhe Shoqëri do të më ndihmojnë të jem në gjendje për t’i ndihmuar njerëzit, sidomos gratë që të arrijnë drejtësi dhe respekt në shoqëri.

A është e vështirë të afrohet dikush, e të flasë me ty?

Jo! Unë jam shumë miqësore për nga natyra. Kjo falë edhe prindërve të mi, të gjithë janë të mirëpritur për të biseduar me mua. E dua shumë sinqeritetin e njerëzve. Më pëlqen të takoj dhe të bisedoj me njerëz të rinj, me kultura të reja, sepse ka aq shumë për të mësuar nga dija dhe vlera e çdo individi. Çdokush në këtë botë e ka veçantinë dhe vlerën e tij. Duhet respektuar edhe mendimi i tjetrit.

Cila ngjyrë të pëlqen më së shumti?

Unë i pëlqej ngjyrat, por varet nga konteksti i vendit ku jam. Në plazh i pëlqej ngjyrat e ndezura, ndërsa ngjyrat që dua me shume unë janë ajo neutrale si e zezë, e bardha dhe ngjyra bezhë, si dhe e gjelbra.

Do të merreni në të ardhmen me botën e modës?

Unë e dua botën e modës. Për mua moda nuk është fikse. Ajo varet nga personi, i cili e vesh një gjë. Që e vogël bëja sfilatë nëpër shtëpi me rrobat dhe këpucët e mamit (ha-ha-ha!). Në fushën e biznesit, ku unë dua të jem, ka rëndësi edhe veshja e një lideri. Përfaqësimi dinjitoz para kolegeve me veshjen e duhur imponon respekt. Pra, moda është e rëndësishme për mua.

Jeni duke i përfunduar studimet master për biznes. Mendoni se në të ardhmen do ta drejtoni ndonjë firmë? Çfarë firme kishe dashur të drejtosh?

Po, unë dua të jem një sipërmarrëse e zonja në të ardhmen. Jam e apasionuar për këtë dhe me pozivitetin që më karakterizon për të mos u tërhequr nga vështirësitë dhe pengesat që do të më dalin, unë do t’ia dal qëllimit për t’i realizuar ëndrrat e mia në jetë dhe për ta gjetur një biznes që unë jam i apasionuar pas tij. «Bëje atë që di ta bësh më», është motoja ime e jetës.

Do të mbetesh në Kanada, në Gjermani, apo do t’i kthehesh Shqipërisë?

Tani për tani, plani im është për të qëndruar në Kanada, me familjen time. Këtu kam me oportunitete për ta realizuar ëndrrën time. Njeriu në jetë nuk e di çfarë do t’i ndodhë pas 5, apo 10 vjetësh.

Për Shqipërinë, sigurisht që ju merr malli. Na thoni drejt, çfarë kujtoni më së shumti nga Shkodra?

Shkodra është një qytet që vetëm më bën të buzëqesh. Ai e ka detin, liqenin, malin, fushën, kodrën. E ka një peizazh fantastik. Njerëzit janë shumë miqësorë dhe plot humor. Shkodra është qyteti i vendlindjes sime, i kulturës, i artistëve më të mëdhenj të Shqipërisë, i këngëtarëve, aktorëve, humoristëve e piktorëve të shquar, i njerëzve bujarë e të dashur, i biçikletave dhe me plot peizazhe historike. Unë e vizitoj Shkodrën shpesh për ta parë familjen time dhe gjyshen time, që e dua aq shumë. Gjithashtu, dashuria e dytë pas Shkodrës është Fieri, vendlindja e babait tim, dhe atje shkoj për ta vizituar pjesën tjetër të familjes. Unë jam e lidhur shumë me familjen. I dua dhe më duan shumë.

«Po, mund të votojnë për mua në këtë link: http://missuniversecanada.ca/vote-for-your-favorite/ »

A ekziston mundësia që bashkatdhetarët tanë, kudo që janë, të votojnë për Ty. Nëse po, na njoftoni ju lutem?

Po, mund të votojnë për mua në këtë link: http://missuniversecanada.ca/vote-for-your-favorite/ . Emri im është në fund të listës, e kjo jo për shkak të votave, por të alfabetit. Mund të votojnë deri në katër herë në ditë. Ju duhet të prisni për 2 deri 3 orë në mes çdo vote për ta marrë kompjuteri votën tuaj. Kjo është një përzgjedhje, nga e cila 20 vajzat më të votuara do të dalin automatikisht në finale. I falënderoj nga zemra të gjithë ata që më kanë votuar e më votojnë. Vota juaj bën të mundur dhe afron fitimin e kurorës për «Miss Universe Canada 2014». Ju faleminderit të gjithë shqiptarëve anembanë botës!

Kuptohet se nga prindërit e keni përkrahjen më të madhe. Cila është fjala më e ëmbël e babait apo nënës suaj që ta kanë thënë, apo ta thonë sa herë ke shkuar në ushtrime për këtë spektakël?

Nëna dhe babai im gjithmonë më thonë që të jem vetvetja. Të kem besim në aftësitë e mia dhe të jem një vajzë e thjeshtë, e çiltër, të jem e komunikueshme me të gjithë njerëzit. Kjo është gjëja më e ëmbël për mua, sepse atyre u pëlqen kjo që jam. Ata janë mbështetja ime më e madhe në jetë. I dua pafundësisht prindërit e mi. Pa ndihmën e tyre, unë nuk do t’i kisha realizuar ëndrrat e mia dhe nuk mund të isha kjo që jam sot. Zoti dhe ata janë mbështetja ime në jetë. Jam e lumtur që ata krenohen me arritjet e mia dhe të vëllait tim dhe mundi i tyre nuk ka shkuar dëm. Unë do të përpiqem t’ua shpërblej këtë në të ardhmen.

Lexoni më shumë në gjuhën shqipe, apo në gjuhë të tjera?

Konkursi «Miss Universe Canada 2014» më ka ndihmuar për të mësuar se si të lexoj dhe të shkruaj më mirë në gjuhën shqipe. Unë jam shumë mirënjohëse për këtë, sepse unë dua të komunikoj me komunitetin tim shqiptar, pasi nuk kam studiuar asnjë ditë gjuhë shqipe në shkollë. Por, besoj se kjo do jetë një sfide e re për mua në të ardhmen, ta studioj mirë edhe gjuhën e bukur shqipe.

Cili është libri juaj i fundit që e ke lexuar?

Është libri «The Secret», nga Rhonda Byrne. Unë e kam lexuar këtë libër disa herë dhe më pëlqen shumë, sepse e tregon se si të menduarit pozitiv është aq i rëndësishëm në jetë. Po të zgjohesh në mëngjes dhe njerëzit të të thonë se sot dukesh keq, sot ke rrathë në sy, e ke një fytyrë të zverdhur, edhe po të mos jesh, bëhesh i sëmurë. Pra, të menduarit me pozivitet, edhe kur je keq, në momente dëshpërimi, lodhjeje e stresi, t’i japësh zemër dikujt se do t’ia arrish, se je i fortë, ke aftësi edhe kur mundësitë janë vogla, e bën luftarak dhe dështimin e sheh jo si fundin e botës, por si një përpjekje se diçka duhet bërë më mirë radhën tjetër.

Shkruani edhe vetë?

Unë jam duke e shkruar librin tim mbi të menduarit pozitiv dhe se si ky mendim mund t’i ndihmojë njerëzit ta përmirësojnë jetën e tyre dhe t’i shohin gjërat, jo vetëm bardh e zi.

Për nga natyra dukeni se jeni bamirëse dhe dëshira juaj është që të punoni në organizata bamirëse që ndihmojnë promovimin e iniciativave kundër dhunës dhe strategjive. Pse?

Unë jam nga një vend i varfër, siç është Shqipëria. Jam nga vendi i Nënë Terezës dhe çdo shqiptar brenda vetes është human për nga natyra. Jam e apasionuar për respekt. Unë besoj se të gjithë meritojnë të respektohen, pavarësisht nga statusi shoqëror që kanë. Kjo falë edhe arsimit tim në Drejtësi. Unë jam duke ndihmuar në promovimin e iniciativave të anti-dhunës dhe strategjitë e zgjidhjes janë pasioni im.

Keni shëtitur nëpër shumë shtete të botës. Cili shtet ju ka pëlqyer më së shumti?

Unë e dua aq shumë sidomos Atdheun tim, por mendoj se për shkak që është diçka ndryshe nga shumica e vendeve që kam vizituar, Australia është njëri nga vendet më interesante që kam parë, meqë kam udhëtuar dhe jetuar atje disa muaj.

Po afrohet data 22 maj kur do të garoni për kurorën e «Miss Universe Canada 2014» dhe sigurisht se je duke u përgatitur, prandaj kush është ai apo ajo që të përgatitë më së tepërmi?

Është një staf i madh njerëzish që i ndihmojnë vajzat të përgatiten për «Miss Universe Canada 2014», por shumë vendime duhen bërë individualisht, sepse ata duan t’i shohin aftësitë e gjithsecilës dhe ata duan t’i vlerësojnë vajzat në individualitetin e tyre, jo vetëm për bukurinë, por në kompleks të gjërave. Tani ka ndryshuar shumë koncepti ‘miss’. Ajo nuk duhet të jetë vetëm e bukur, por të jetë edhe një ambasadore e bukurisë, e edukatës, e zgjuarsisë femërore.

Nëse do të kishe pasur mundësi ta ndryshosh në trupin tuaj, çfarë kishe për të ndryshuar?

E falënderoj Perëndinë dhe prindërit e mi që më kanë lindur. Unë jam Zerina dhe nuk kam çfarë të ndryshoj në trupin tim. Jam e kënaqur me këtë që jam. Thjesht, si çdo femër, përpiqem të shkoj në palestër, t’i mbaj linjat, të kem kujdes në ushqim dhe ta mbaj një dietë të shëndetshme. E kam një trajner që me ndihmon në këtë drejtim. Këtë besoj se e bën çdo femër me ato mundësitë që i ka.

Pëlqeni të fotografoheni?

Varet për çfarë arsye.

Sigurisht se edhe këndoni. Cila këngë të pëlqen më së shumti, e kam fjalën për muzikën në gjuhën shqipe? 

Nuk është vetëm një këngë ose një këngëtar që më pëlqen në gjuhën shqipe. Sa herë shkoj në Shqipëri marr shumë CD të reja dhe dëgjoj shumë këngë shqipe, madje edhe i këndoj nëpër gëzime familjare. I dua këngët e muzikës së lehtë, moderne, por edhe ato popullore, si të veriut, por edhe të jugut. I dua këngëtaret e mirë që këndojnë «live».

Mirupafshim dhe gjithë të mirat! Ju falënderoj edhe një herë për intervistën dhe Ju urojmë shumë suksese!

Faleminderit për këtë mundësinë që të prezantohem për publikun tuaj. Kënaqësia ishte e gjitha imja. E dua Shqipërinë, e dua Kosovën!