Letra e një ushtari që nuk u kthye kurrë nga lufta

Një ushtar britanik i shkruan një letër të ndjerë të dashurës së tij nga fronti i luftës. Frank Bracey shkruan në letër se ndien se nuk do të kthehet më nga lufta dhe shpreh dëshirat e tij të fundit. Dhe në të vërtetë, kështu ndodh. Ai nuk kthehet më nga një prej betejave gjatë Luftës së Parë Botërore.

Bracey, pjesëtar i Royal Garrison Artillery, u vra në Pas-de-Calais, më  3 gusht 1916. Letra e tij dhe fotoja ku duken qartë njollat e lotëve mbi bojë është botuar sot në gazetën “The Independent”.

“Shumë e shtrenjta Uin,

Po të shkruaj dy rreshta, në rast se ndodh diçka. Thjesht për të të treguar se sa të kam dashur gjithmonë, zemër. Ti je vogëlushja më e mirë në tokën e Zotit, ta kam thënë ndonjëherë këtë?

Por unë po të shkruaj këtë letër, sepse kam një parandjenjë se nuk do të kthehem më kurrë. I ruaj letrat e tua në kuti dhe shpresoj të kesh bërë të njëjtën gjë edhe ti me të miat dhe kartolinat që të kam nisur.

Nëse kthehem, e dashur, ti nuk do ta shohësh kurrë këtë letër, por kam një parandjenjë se nuk do ta shoh më kurrë Anglinë. Nëse unë përfundoj i varrosur, dëshiroj që ti të jesh e lumtur dhe të gjesh dikë që vlen më shumë se unë, i përuluri yt. Ti ke qenë gjithçka për mua Uin. E di se dashuria jote më përket mua përgjithmonë, e shtrenjta ime, por në rast se nuk kthehem, të uroj gjithë lumturinë e botës dhe një bashkëshort të denjë për ty. Nuk e kam harruar atë që më the kur të pyeta se çfarë do të bëje nëse nuk do të kthehesha, por, Uin, për hir të dashurisë tonë, dua të jesh e fortë. E di që do të ishte e vështirë për ty vogëlushe, por mos bëj asgjë nga ato që më ke thënë.

Dëshira ime e fundit është që ti të martohesh me një burrë të mirë, të jesh e lumtur dhe të mendosh për mua, të përulurin tënd, ndonjëherë.

E ndjeva se duhej t’i shkruaja këta rreshta Uin, por çfarëdo që të ndodhë, e dashura ime, bëje zemrën të fortë dhe mendo që Franku yt e bëri detyrën e tij për njerëzit e ishullit të vogël.

E pres që ti tani të mendosh për mua si për një të çmendur, por nuk kam qenë kurrë më i kthjellët seç jam në këtë moment.

 Përktheu: Gazmira Sokoli