Intervista/ Muhamed Zekiri: Ju pengoj shumicës, sepse flas pa doreza për subjektet politike (VIDEO)

Në një intervistë për Tv "Art" të Tetovës, në kuadër të emisionit “Në Fokus”, kryeredaktori i Alsat-M, Muhamed Zekiri, ka folur për fillimet e tij në gazetari, problemet që e shoqërojnë profesionin e gazetarisë, shkuarjen e tij në Haxh, po ashtu flet edhe për problemet me PDSH-në e Menduh Thaçit, duket thënë se ende e ka derën e hapur për të marrë pjesë në 'Rruga Drejt', dhe shumë të tjera.

Më poshtë portali Almakos ju sjellë të plotë këtë intervistë:

Keni pranuar postin e Kryeredaktorit në TV Lasat-M, në një moshë relativisht të re. Duke marrë parasysh impaktin që ka patur dhe që vazhdon të ketë ky televizion, a ka paraqitur ngarkesë për ju, ky post?

-Kam patur edhe unë këto dilema nga oferta që më është bërë në atë kohë, mirëpo, duke marrë parasysh se kam filluar shumë i ri të merrem me këtë profesion. Nga mosha 18-vjeçare kam filluar të punoj në televizion. Pak më herët derisa kam qenë në shkollë të mesme kam punuar në radio këtu në Shkup,mandej vazhdova në TV ERA, në TV Kanal 5 dhe pastaj 6 vite kam punuar si korrespodent i Radios “Evropa e Lirë” në Redaksinë e Gjuhës Maqedonase. Në vitin 2006 kur u hap Alsati unë disa muaj kam qenë korrespodent për Tiranën dmth kam mbajtur edhe Radion Evropa e Lirë edhe Alsatin dhe kur mu bë oferta e pranova pasiqë e pashë si sfidë dhe mendoj që nuk gabova që ndërmora këtë hap dhe këtë vendim dhe ja, nga 2006 jam në këtë pozitë dhe Alsati ka arritur të shënojë suksese të mëdha duke patur parasysh se është televizion i vetëm privat në nivel kombëtar në Maqedoni.

Si është thelbi i funksionimit të Departamentit të Informacionit?Gazetarët Tuaj a kanë të drejtë të komentojnë lajmet apo thjesht të pasqyrojnë atë që ndodh në teren?

Zekiri: Gazetarët kanë të drejtë të propozojnë tema. Të gjithë e dinë se ne kemi lajme edhe në gjuhën shqipe edhe në gjuhën maqedone. Ekipi ynë i gazetarëve në pjesën e informative është i përzier. Kemi redaktorë edhe shqiptarë edhe maqedon poashtu edhe gazetarë të të dy nacionaliteteve, por, puna është se të gjithë punojnë për një prodhim dhe ai prodhimi i njëjtë plasohet në edicionet e lajmeve. Nëse gazetari e ka shkruajtur tekstin në gjuhën shqipe, i njëjti redaktohet dhe jepet në përkthim e njëjta ndodh edhe me tekstin në gjuhën maqedonase. Dmth si redaksi nuk punojmë të ndarë por thjesht si një redaksi e përbashkët si një bërthamë. Gazetarët kanë të drejtë të propozojnë tema,të punojnë tema, mirëpo, dihet se kur mund të komentojë dhe kur duhet të plasojë informatë. Politika jonë redaktuese është që t`ju pasqyrojmë qytetarëve dhe publikut tonë, çka është realiteti dhe çka në fakt po ndodh në shoqërinë tonë,në vendin tonë,pavarësisht se në cilat sfera ndodhin ato:në politikë,arsim,sociale etj

A jeni të kënaqur me atë që ka arritur Alsati apo thjesht çdoherë mund të bëhet më shumë?

Zekiri: Nëse jemi të kënaqur nuk kemi bërë asgjë. Çdoherë duhet punuar që të arrihet më shumë. Ndoshta asnjëherë nuk do të arrijmë maksimumin por duhet që të punojmë pandërprerë që ta arrijmë atë maksimum. Ne nuk themi që jemi më të mirët,që jemi më të diturit,mirëpo,jemi të kënaqur me impaktin që kemi tek shikuesit tanë. Jemi të kënaqur me anketat e ndryshme që bëhen, ku del se TV Alsat, si Tv shqiptar para së gjithash, në anketën e fundit pak para zgjedhjeve del si TV më i besueshëm – gjegjësisht programi informativ i këtij televizioni . Nuk ka satisfaksion më të madh se kjo që qytetarët të të besojnë në atë që ti ua ofron si informatë. Kjo nuk arrihet nëse nuk punohet në mënyrë profesionale dhe nëse nuk i ke brenda informacionit të gjitha palët që duhet t`i përfshijshë.

Edhe pse projekti që të emetohen lajme në dy gjuhë u prit me një skepticizëm në mesin e qytetarëve, Ju arritët të vendosni  këtë standard në edicionin e Lajmeve. Nuk deshët që në këtë mënyrë t`i drejtoheni vetëm 1/3 së popullatës në Maqedoni?

Zekiri: Ne mburremi me atë që e kemi arritur dhe që jemi të parët,jo vetëm në Maqedoni,por edhe në rajon edhe më gjerë, që kishim guximin të ndërmarrim një hap të këtillë dhe që në fund rezultoi si një projekt i suksesshëm. Nuk e kishim idenë që ne të mbyllemi brenda komunitetit tonë, të mbyllemi vetëm tek shqiptarët dhe të punojmë vetëm për shqiptarët. Qëllimi parësor dhe kryesor ishte që t`u drejtohemi të gjithë popullatës së këtij vendi,i cili është po aq i yni sa edhe i atyre që pretendojnë se janë shumicë në këtë shtet. Ideja jonë ishte që njëri-tjetrin përmes këtij televizioni ta njohin më mirë. Komunitete që jetojnë njëri pranë tjetrit dhe nuk bashkëjetojnë ashtu siç duhet apo ashtu siç parasheh ndoshta edhe një Marrëveshje e Ohrit,që nuk duhet të jetë ajo bazë, mirëpo, Maqedonia gjithmonë ka qenë shtet multietnik,këto hapësira gjithmonë kanë qenë ashtu të përziera dhe nuk duhet jetuar njëri pranë tjetrit por duhet bashkëjetuar. Kjo formulë e jonë ka treguar suksese,por duhet potencuar se këtë e kemi bërë me forcat tona,këtë e kemi bërë pa mbështetjen e askujt edhe pse skepticizmi ka qenë shumë i madh.Ne kemi menduar se në fillim do të ketë reagime negative nga shqiptarët,por,fatkeqësisht nga pala maqedonase ka patur më shumë reagime negative. Shqiptarët me këtë tregojnë se janë më tolerant se sa që janë pala tjetër,mirëpo,shumica pas skadimit të disa viteve e kuptuan këtë realitet dhe kanë vetëm fjalë miradije.

Ju thatë se pati reagime negative tek maqedonasit,standardi dygjuhësor i edicionit të Lajmeve. Por, çfarë impakti pati tek elitat intelektuale dhe politike maqedonase ky projekt?

Zekiri: Sigurisht se qasja e një mediumi apo televizioni është më i lehtë brenda komunitetit të tij. Ne, ku mund të shkojmë sigurisht se mediet maqedonase nuk mund të shkojnë, pikërisht atë çka mendon qytetari thjeshtë shqiptar, qoftë në Likovë, Tetovë, Kërçovë e Strugë ne mund t`ua ofrojmë duke i përkthyer tekstet ia ofrojmë deklaratat e tyre edhe palës maqedonase ta dëgjojnë në gjuhën e tyre se çka mendon bashkëqytetari i tyre shqiptar në këtë shtet, i cili duhet të jetë i barabartë me të. Këtë mundësi ata nuk e kanë patur më herët.Nëse shqiptarët,qytetarët e zakonshëm flasin para medieve shqiptare,flasin më lirshëm,që nuk është rast nëse jep deklaratë për ndonjë medium maqedonas. Pikërisht për këtë ky projekt është përqafuar nga shumica e qytetarëve të vendit dhe nga pala maqedonase, të cilët,tashmë kanë një burim ku mund të informohen se çka ndodh në komunitetin shqiptarë?Cilët janë pakënaqësitë e tyre?

Video - Intervista me Kim Mehmetin:

A ka patur tentime që politika ditore të ndikojë në politikën redaktuese të Televizionit Alsat-M?

Zekiri: Nuk ka subjekt politik,jo vetëm në Maqedoni,por,besoj edhe më gjerë,që nuk dëshiron të ketë dorë mbi mediet, posaçërisht kur ata kanë ndikim më të madh.Mirëpo,duke punuar në mënyrë profesionale dhe duke qenë në shërbim të qytetarëve, subjektet politike e shohin deri ku e kanë kufirin dhe nuk mund të ndikojnë ndoshta ndonjëherë që kanë menduar se mund të ndikojnë. Nuk është e fshehtë, të gjithë e dinë se Alsati në fillimet e saj është ballafaquar me një sfidë të madhe të presioneve politike nga viti 2006 deri në vitin 2008, kur na janë rrahur,kërcënuar gazetarët,kur na janë vjedhur antenat dhe na është penguar sinjali. Ne i kemi tejkaluar të gjitha këto dhe pikërisht jemi këtu ku jemi tani. Unë gjithmonë politikanëve ju them një gjë. Ata duhet ta kuptojnë një punë.Profesioni i politikanit është kaluese,politika është kaluese. Sot janë deputetë,sot janë ministra nesër nuk do të jenë. Gazetari do të jetë gazetar edhe ai kur do të jetë në pushtet por edhe kur do të jetë në opozitë. Kështuqë, secili që do të tentojë të fillojë ndonjë betejë me gazetarë atë betejë e ka të humbur qysh në fillim.

“Marrëveshja e turpit”,”Zhgënjimi i fundit” janë disa margaritarë që kanë dalë pikërisht nga ky televizion.Këto komente kanë vulën e Muhamed Zeqirit apo të TvAlsat?

Zekiri: Komenti është i imi,mirëpo unë jam pjesë e Alsatit.Komentet e këtilla poqese unë nuk do të isha në Alsat nuk do ta kishin këtë jehonë. Varësisht prej zhvillimeve politike ka patur edhe komente dhe editoriale tjera, përveç këtyre që i përmendët.Nuk kanë qenë të shpeshta,por këta kanë qenë qëndrime të Alsatit që transmetohen përmes meje si Kryeredaktor dhe Drejtor i Informacionit në Alsat. Ideja pse dhe çka më motivon të reagojë në mënyrë të këtillë është se unë vlerësoj,nga kjo pozitë të cilën e kam, se duhet ta them atë që besoj dhe duke parë reagimet e të gjitha komenteve që i kam patur nga qytetarët e thjeshtë,dua që përmes zërit tim, përmes Alsatit të arrijë deri tek politikanët të cilët nuk e kanë mbajtur fjalën,nuk e kanë realizuar atë që kanë premtuar dhe unë do ta transmetoj. Vetëm ajo ka qenë motivi pse unë vendosi ndonjëherë të dal me komente të këtilla në emër të TV Alsat.

Pavarësisht postit që e keni në Tv, çka ju shqetëson juve si Muhamed Zeqiri,nga politika shqiptare këtu në Maqedoni?

Zekiri: Si Muhamed Zeqiri atë që e mendoj dhe e them dhe nuk hezitoj ta them, pavarësisht edhe kur nuk jam në orar të punës ose kur jam në punë.Gjithmonë e shprehi atë që mendoj. Ajo që më shqetëson mua besoj se është e njëjtë me atë që shqetëson çdo qytetarë, çdo shqiptarë. Më pengon kur politikanët nuk janë konenzistent në atë që e thuan, më pengojnë se mendojnë që popullata është e paditur dhe njerëzit nuk dinë të vlerësojnë,ajo më pengon shumë. Nëse diçka ke thënë, fjala publike është shumë e madhe. Nëse publikisht ke thënë diçka duhet të qëndrosh parapa saj dhe nuk mund të mendosh menjëherë se dikush ka harruar .Edhe vota është e shenjtë. Ta kanë dhënë atë votë pasiqë u ke thënë se do të realizosh diçka. Nëse nuk e ke realizuar, nëse i zhgënjen ata është problem dhe kjo më shqetëson mua. Nëse dikush ka mbështetur një koncept pasiqë ka menduar se ai koncept është i mirë dhe ti menjëherë pas asaj ndryshon mendje dhe bën diçka krejtësisht tjetër – kjo nuk është në rregull dhe ajo është pse unë reagoj. Besoj se nëse uleni diku për të pirë kafe në çdo vendbanim me shumicë shqiptare do t`i dëgjoni ato shqetësime që unë ndoshta i kam shprehur në komentin tim.

Qëndrimet tuaja i pengojnë edhe partisë maqedonase në pushtet VMRO-DPMNE-së.Ka patur disa akuza të rënda në adresë tuaj.Si jeni ballafaquar me këtë?

Zekiri: Unë i pengoj shumicës. Njerëzit që flasin pa doreza iu pengojnë shumë subjekteve.Sigurisht se me qëndrimet e mija i pengoj edhe partisë më të madhe maqedonase në pushtet. Pasi t`a shprehi qëndrimin tim nuk nisem nga ajo se kush dhe si do të reagojë. Unë e dijë se nuk ka kush që të më ndalojë, përveç zotit që ta them atë,që dua ta them. A është parti maqedonase a është parti shqiptare,nëse mendoj se ka bërë ndonjë veprim të gabuar, unë do ta kritikoj.Nëse dikush ka bërë punë të mirë nuk hezitoj që ta lavdëroj.  Fanatikët partiak dhe mbështetësit e disa subjekteve janë të atillë që ndoshta nuk mendojnë më thellë dhe të akuzojnë dhe të etiketojnë se ti je me këtë apo me atë parti. Nuk mundesh të gjithëve t`ua ndërrosh mendjen.Puna ime është që t`a them të që mendoj dhe mandej secili është i lirë të thotë se kjo është e mirë apo e keqe.Unë nuk them se kam të drejtë gjithmonë .Nuk ka njeri të pagabueshëm. Nuk ua imponoj që edhe të tjerët të mendojnë ashtu si unë. Unë e them ashtu siç unë e mendoj.

Pse Këshilli për Radiodifuzion i RM i kushton një vëmendje të veçantë asaj që raporton Alsati e jo gjuhës së urrejtjes së psh:Llatasit?

Zekiri: Unë publikisht kam reaguar në këtë mënyrë selektive të reagimit të KRD-së.Alsati u gjend në shënjestër të KRD-së pas reagimit të Ministres së Punëve të  Brendshme,Gordana Jankullovska,të cilës i pengoj qasja e Alsatit që fillojë të ketë mbi rrahjet e fëmijëve shqiptarë bë autobusat e Shkupit.Ne i kemi përcjellë vazhdimisht të gjitha ato incidente që kanë ndodhur dhe shqetësimi më i madh është se kur kanë qenë në shënjestër nxënësit shqiptarë,nuk ka ndodhur asnjë rast të zbardhet dhe ne filluam të kërkojmë llogari për këtë .Kërkojmë informata se deri ku është zbardhja e këtij apo atij rasti.Kjo qasje filloi t`i pengojë Ministrisë së Brendshme gjegjësisht Ministres Jankullovska.Ajo,për herë të parë në historinë e Maqedonisë,dërgoi parashtresë në KRD kundër Alsatit duke menduar se Alsati bën nxitje të urrejtjes ndëretnike.Cështë më e keqja,Kryetari i KRD i cili është i po të njëjtës parti të së cilës i takon Ministrja Jankullovska ,gabimin e parë e bëri me atë që dërgoi komunikatë pa i pyetur edhe anëtarët tjerë të KRD-së,kokë në vete,pasiqë ashtu e kishte urdhëruar partia.Ai doli që të na sugjerojë neve se çka të bëjmë.Nëse dikush e ka përcjellë këtë ngjarje si zhvillim anëtarët shqiptarë të KRD-së u distancuan nga ajo komunikatë dhe ky çka bëri të nesërmen thirr mbledhje të KRD-së ,sërish për ta konstatuar,pasiqë kanë shumicë anëtarët e VMRO-DPMNE në atë këshill,të votojnë se Alsati ka nxitur urrejtje ndëretnike që në fakt nuk ka lidhje.Ndërkaq ju e përmendët si shembull Llatasin,unë nuk dua personalisht të merrem me të,por nuk e kam edhe problem që të merrem.Nëse dikush nxit urrejtje ndërnacionale është pikërisht ai person dhe ai televizion dhe ne nuk kemi parë asnjëherë që Këshilli për Radiodifuzion apo ndonjë institucion tjetër të dalë dhe të dënojë fjalorin që e përdor ai person dhe televizioni në përgjithësi.

Për rastet e incidenteve ndërtenike,”Car Dushanin”gazetarët tuaj a kanë informuar në mënyrë emocionale?

Zekiri: Prap e them se këtu nuk ka emocione...

Por çfarë e bën Alsatin që të dallojnë nga televizionet tjera,që të jetë nën mbikqyrje të veçantë nga KRD-ja?

Zekiri: I pengon pasiqë ne kritikojmë gjithçka që është në disfavor të shqiptarëve.Ne jemi televizion nacional i vetëm shqiptar dhe sigurisht se atyre u pengon.U pengon atyre se ne informojmë psh për “Car Dushanin”...u pengon se asnjë institucion nuk e morri përgjegjësinë se kush e ka vendosur atë. Edhe sot e kësaj dite ne nuk e dimë se kush e ka vendosur. Alsati nuk ka reaguar me emocione por në mënyrë profesionale tek çdo institucion;kush e ka vendosur?Ka leje apo nuk ka leje?Ne e kemi ruajtur profesionalitetin në këtë drejtim dhe atyre u pengon pse ne e bëjmë. Pjesën dërmuese të medieve e kanë nën kontroll  dhe shumicës së atyre medieve nuk iu pengon se pse rrihet një fëmijë shqiptar . Televizionit Alsat i pengon. TV Alsat buron nga populli,bashkëjeton me ata njerëz çdo ditë. Adresa, jo më e fundit ,por e parën ku ata kërkojnë ndihmë është TV Alsat për çdo ngjarje që ndodh në shoqërinë tonë.

Në mesin e shumë “armiqve”,fatkeqësisht keni  edhe një “armik” ashtu të themi në mesin e partive politike shqiptare.Pse asnjë zyrtar i lartë i PDSH nuk ka qenë asnjëherë mysafir në TV Alsat-M?

Zekiri: Nuk është e vërtetë se nuk ka qenë asnjëherë.Mysafiri i fundit nga PDSH-ja që ka qenë në emisionin “Rruga Drejt...” ka qenë Iljaz Halimi-kandidati presidencial i PDSH-së në këto zgjedhje. Deklaratat e tij,po në atë emision që shkaktuan reagime të mëdha lidhur me temën e Burmali Xhamisë,nxitën revoltë të madhe tek opinioni dhe pas asaj më nuk ka ardhur asnjë zyrtar i PDSH-së. Armiqësia në thojza, unë mendoj se është e pakuptimtë nga ana e tyre,nga ana e liderit të tyre.

A e keni ftuar liderin e kësaj partie të merr pjesë në ndonjë emision?

Zekiri: Unë e kam ftuar edhe publikisht kohëve të fundit që ai e ka të hapur derën kur të dëshirojë që të vijë si mysafirë.Asnjëherë nuk i kemi mbyllur dyert për përfaqësuesit e PDSH-së.Është për t`u habitur se jemi shteti i vetëm ku një medium me ndikim kaq të madh bojkotohet nga një parti opozitare. Opozita duhet t`a shfrytëzojë çdo moment që të paraqitet në media dhe të thotë qëndrimin e vet për çdo temë.Ata nuk e shohin të arsyeshme që të dalin para qytetarëve. Unë si udhëheqës i emisionit nuk mundi dikë të kontrolloj se çka do të thotë. Emisionet janë të drejtpërdrejta.As t`ua shtrembëroj e as t`ua drejtoj deklaratat. Qytetarët do të vlerësojnë se kush kishte të drejtë, mirëpo vullneti për të patur debat është për t`u habitur. Unë e kam thënë edhe publikisht. Para fillimit të këtij sezoni kam patur dy takime me përfaqësues të PDSH-së,për t`i lutur për të ardhur, për t`ua shtrirë dorën që të vijnë,për të treguar vullnetin e mirë të TV Alsat. Mendoj se është një minus i madh që të mos ketë debate në shoqërinë tonë. Jemi shndërruar njëjtë ashtu siç është shëndruar politika maqedonase ku nuk ka debat mes tyre. Mendoj se ne duhet të jemi shembull për këtë. Ata e kanë derën e hapur . Mirëpo edhe pas dy takimeve që kishin, edhe pse pjesa më e madhe e përfaqësuesve të PDSH-së kanë dëshirë të marrin pjesë në debate , këtë nuk mund t`a bëjnë shkaku i liderit të tyre,i cili ua ka mbyllur derën.Nëse ju kujtohet në Zgjedhjet Parlamentare  të vitit 2011 organizova edhe debat të partive politike. Atëherë ishin katër subjekte politike: Ali Ahmeti i BDI-së erdhi, Rufi Osmani i RDK-së erdhi  dhe Imer Selmani i DR-së erdhi .Mirëpo Menduh Thaçi i PDSH-së edhe pse e kishte të konfirmuar pjesëmarrjen në atë kohë, gjysëm ore përfaqësuest të kësaj partie,të sigurimit të tij u futën në televizion dhe erdhën. Kërkuan ta shohin vendin se ku do të vendoet e si do të vendoset. Kur erdhi momenti që të fillojë emisioni ai nuk u paraqit. E kemi shtyrë emisionin 15-20 minuta, nuk e filluam me kohë duke shpresuar se do të vijë.Ai nuk erdhi.Arsyet pse nuk vjen i din vetëm ai.

Me gjithë këtë “bojkotim”nga ana e tyre ju keni ndjekur aktivitetet e tyre?

Zekiri: Absolutisht që po,edhepse askush nuk mund të na ndalojë as mua e as TV Alsat që të marrim qëndrim për të mos i ndjekur,pasiqë ata sillen në këtë formë siç sillen,që  unë mos t`i përfill e as TV Alsati të mos i përfill.Mirëpo deputetët e tyre në Parlament në fillim pyesin se  a është Tv Alsati këtu, e pastaj dalin në foltore të flasin, sepse e dinë që është mënyra e vetme kur do të paraqiten në Alsat. Ne nuk kemi hezituar asnjëherë që ti përcjellim ngjarjet e tyre edhepse gjatë kësaj fushate, nuk e kam përmendur deri më tash, kur kemi shkuar që të përcjellim mitingjet e tyre parazgjedhore, dy-tre herë na kanë thënë se ata nuk mund që të na garantojnë sigurinë neve dhe më mirë është që të mos shkojmë që t`i përcjellim. Mirëpo në asnjë edicion të lajmeve nuk ka munguar informacioni për fushatën se ku kanë qenë, çka kanë thënë dhe çka kanë bërë,pikërisht ashtu siç kemi informuar edhe për subjektet tjera politike.

Si e shihni gjendjen e përgjithshme në gazetari e sidomos në atë shqiptare?

Zekiri: Në nivelin e përgjithshëm gjendja është në nivelin më të ulët që ka qenë ndonjëherë në Maqedoni.E gjithë kjo nga shkaku se pjesa më e madhe e medieve është e ngulfatur nga partia më e madhe maqedonase në pushtet.Ne kishim një rast konkret.Gjatë fushatës parazgjedhore partia më e madhe opozitare maqedonase hap dy-tri skandale,të cilat në asnjë TV kombëtar,përveç Telmës nuk transmetohen.As MTV-ja,as Siteli,as Kanal 5, as Alfa nuk i transmetojë kronikat  për një skandal aq të madh për të cilën akuzohet me dëshmi,audio dhe video,kryeministri,ministri i brendshëm, funksionarë të lartë dhe ata nuk shfaqen në mediat. Nuk ka nevojë më të shkohet e të komentohet më shumë.Sa i përket gazetarisë shqiptare, ne edhe në fillim kur kemi startuar si televizion,problemin kryesor e kemi patur me kuadrin e gazetarëve shqiptarë.Mendoj se ka hapësirë por duhet vullnet nga të rinjtë që kryejnë gazetarinë,që të tregojnë iniciativë që e duan këtë profesion. Ne u kemi dhënë shumë mundësi praktikantëve për të ardhur dhe për të parë se si shkon puna dhe fatmirësisht ka disa prej tyre që janë bërë pjesë të ekipit tonë. Dëshirojmë t`i motivojmë ata që të vijnë dhe të fillojnë këtë profesion i cili padyshim kërkon shumë sakrificë dhe nuk është si profesionet tjera. Ky është profesion pa orar pune,më shumë do të jesh në punë se sa me familjen.Alsatin dhe çdokund që kam punuar ,e kam si shtëpi të dytë.

Duke marrë parasysh gjendjen e gazetarisë në përgjithësi. Mos janë vallë gazetarët viktimë të ambicjeve politike të pronarëve të medieve?

Zekiri: Një pjesë e gazetarëve sigurisht janë viktimë të ambicieve të këtilla.Kur përzihen punët në atë se çka dëshiron të bësh është vështirë të mbijetosh.A e kanë fajin edhe vetë gazetarët.E kanë fajin sepse nuk janë të zëshëm.Pse nuk janë të zëshëm?Sepse e ka siguruar një kafshatë buke aty dhe varet prej asaj pune,nuk guxon ta thotë atë që e mendon. Mirëpo ky nuk është arsyetim.Gazteratë duhet vetë që të luftojnë dhe ta fitojnë atë që u takon. Jo të marrin diçka që nuk u takon.Të jenë gazetarë dhe të mos vihen në funksion të dikujt tjetër.Ata që kanë pretendime tjera si pronarë të medieve do e kenë rrugën e humbur. Velija Ramkovski është shembulli i keq dhe i hidhur i cili nga një medium i cili ka qenë pishtarë i mediave të lira, A1 qëka filluar e para tani u shua? U shua shkaku se pronari pretendonte se është kryeredaktor dhe ai vendos se çka duhet të behët.Ajo është puna më e keqe që mund t`i ndodhë një televizioni kur pronari,fillon,dëshiron dhe ka ambicie të përzihet në punët e gazetarisë.

Nëse ndonjëherë keni patur presione të ndryshme.Këtë e keni përjetuar sepse keni qenë kundër pushtetit apo pse keni qenë neutral?

Zekiri: Mënyra më e vrazhdë me të cilën jemi ballafaquar me presione ka qenë periudha e vitit 2006-2008.Presione tjera mund të jenë reagime individuale të njerëzve të caktuar të cilët janë prekur nga tema të ndryshme që ne i trajtojmë. Por, kur ne nuk jemi gjunjëzuar para presioneve të vitit 2006-2008, këto tjerat shumë më pak do të mund të na gjunjëzojnë.Asnjëherë nuk e kemi ndërmend që të ndalemi dhe të bëhemi pre e e ndonjë provokimi apo presioni që mund ta bëjë kushdo qoftë.

Nuk e fshihni madje me krenari e theksoni se keni kryer Medresenë.Nuk e fshehni madje edhe më me krenari e theksoni se keni kryer Haxhin.A paraqet çështja e fesë tek ju stimul për punën e përditshme apo thjesht jeni një besimtar i devotshëm?

Zekiri: Puna e besimit është punë individuale,mirëpo,asnjëherë nuk turpërohem të them se jam musliman.Nuk pretendoj të turpërohem se kam kryer medresenë dhe asnjëherë nuk turpërohem të them se kam kryer një obligim siç është haxhi , më është dhënë mundësia dhe i kam bërë. Nuk i kam bërë për hatër të dikujt tjetër por pasiqë e kam ndjerë si obligim dhe jam besimtar.Atë e kam përparësi dhe asnjëherë nuk kam thënë se ndjehem më shqiptarë apo më mysliman se dikush tjetër. Unë jam rritur në një familje të tillë. Qysh si i vogël nga gjyshi e kam mësuar leximin e kuranit dhe bazat e fesë nga familja.Të gjithë janë habitur kur unë,pa imponimin e askujt,vendosa të shkoja në Medrese. Ta kryej këtë shkollë dhe pse t`a fshehi të mos e deklaroj.

Sipas disa anketave ju cilësoheni si “njeriu më me ndikim tek shqiptarët në Maqedoni”. Si ballafaqohesh me këtë presion? A janë atëherë përgjegjësitë më të mëdha?

Zekiri: Përgjegjësia është shumë e madhe dhe sigurisht duhet patur kujdes në atë se çfarë them dhe si e drejtoj këtë medium. Përgjegjësia është më e madhe sa që unë ua kam thënë edhe politikanëve  se zëri ynë arrinë të futet çdo natë në çdo shtëpi të shqiptarët , ndërkaq zëri i tyre nuk mund të arrijë atje nëse nuk jemi ne. Kjo është arma më e fortë e çdo mediumi .Ata duhet ta kenë të qartë këtë punë  dhe këtu është përgjegjësia jonë e madhe se si do ta drejtojmë këtë medium.Jemi të vetëdijshëm që në këtë punë çdoherë do të jemi të sharë.Nuk mund të kënaqim apetitet e secilit.

Për fund ku e shihni veten pas një periudhe.A do të vazhdoni të promovoni këtë vijë politike që të jeni “therrë në sy për politikat e gabuara”?

Zekiri: Unë do të jem therrë në sy për të gjithë politikanët që nuk mbajnë premtimet e dhëna,ata që do të zhgënjejnë qytetarët shqiptarë votuesit e tyre.Do të vazhdoj të kryej këtë funksion. Në gazetari jam që nga mosha 18-vjeçare dhe tani,për ata që nuk e dinë i kam plot 35 vjet,dmth gjysmën e jetës time deri më tani ia kam kushtuar këtij profesioni dhe do ta bëj edhe më tutje në këtë formë;do të jem transparent dhe asnjëherë nuk do të hezitoj ta them atë që e mendoj..../Almakos