“Visa” dhe ”MasterCard” kërcënojnë me largim nga Moska

Autoritetet ruse shpresojnë në gjetjen e një kompromisi mes grupeve amerikane të kartave të kreditit “Visa” dhe ”MasterCard”, të vëna në vështirësi nga një projekt i legjislacionit rus që e ka shtyrë kompaninë  “Visa” të kërcënonte në pezullimin e aktiviteteve në këtë vend.
“Një kompromis duhet gjetur deri në 1 korrik. Thjesht do të ketë një reduktim të shumës së depozitave, e nevojshme për ‘Visa’-n dhe ‘MasterCard’-in për vazhdimin e aktiviteteve në Rusi”, u shpreh sot Anatoli Aksakov, zëvendës presidenti i Komisionit të Dumës (Dhoma e Ulët) në lidhje me tregjet financiare.
“Duhet të diskutojmë dhe të përcaktojmë një shumë të arsyeshme me synim që këto kompani të jenë të interesuara të vijojnë aktivitetin në tregun rus”, shtoi ai.
Më 1 korrik pritet të hyjë në Rusi një ligj që synon në krijimin e një sistemi kombëtar pagesash elektronike, si përgjigje ndaj ndjeshmërisë së Rusisë ndaj dy sistemeve amerikane të cilët aplikuan në muajin mars sanksione amerikane kundër Moskës.
Ligji gjithashtu u kërkon operatorëve të huaj të përcaktojnë një fond special në Bankën Qendrore Ruse, që mund të merren në rast pezullimi të veprimtarisë së tyre.