Bosnje-Hercegovina dhe Serbia përballë përmbytjeve më të rënda që prej një shekulli (VIDEO)

Bosnje-Hercegovina dhe Serbia, ku përmbytjet më të rënda që prej 120 vjetësh kanë shkaktuar deri tani të paktën 30 të vdekur dhe evakuimin e disa dhjetëra mijëra personave, vazhdojnë edhe sot luftën kundër përmbytjeve.
Blanci i këtyre përmbytjeve është edhe më i rëndë pasi Beogradi ka refuzuar të japë informacione para përfundimit të operacioneve të shpëtimit. Zyrtarisht tre të vdekur janë njoftuar në Serbi.
Në Bosnje-Hercegovinë, vetëm në qytetin Doboj, në veri, janë njoftuar të paktën 20 të vdekur, sipas kryetarit të  Bashkisë, Obren Petrovic.
Situata mbetet ende shumë kritike përgjatë lumit Sava që shtrihet në veri të Bosnje-Hercegovinës dhe kalon Serbinë në lindje të Beogradit, ku derdhet në Danub.
Në Bosnje, qytetet nga Samacu, të përmbytura krejtësisht dhe Bijeljina si dhe rrethinat janë më të prekurat.
Rreth 10 000 persona janë evakuar në këto zona, sipas medias lokale. Operacione evakuimi me anije shpëtimi dhe helikopterë janë dërguar në Bosnje nga Sllovenia dhe Kroacia.
Qindra persona kanë bërë thirrje për ndihmë në Samac dhe janë në pritje të evakuimit.
“Që prej agimit ne kemi dërguar ekipe shpëtimi në një zonë të qytetit ku nuk kemi mundur të futemi deri tani. Ka të sëmurë që presin. Po hymë në qytet me ankth, nga frika se çdo  të mund të zbulojmë”, theksoi kryetari i Bashkisë së këtij qyteti, Samo Minic, për radion publike.
Dhjetëra fshatra janë shkatërruar nga rrëshqitjet e tokës në disa rajone të vendit, veçanërisht në rrethinat e Zenicës, tregojnë të prekurit nga kjo katastrofë natyrore, të strehuar në kazerma dhe shkolla.
Në Serbi, rreth 20 000 persona janë evakuar në disa qytete, veçanërisht në Obrenovac, pranë Beogradit. Më shumë se 100 000 persona vazhdojnë të jenë të privuar nga energjia elektrike në dy vende.
Dhjetëra ekipe shpëtimi, dërguar nga vendet evropiane dhe Rusia kanë mbërritur në vendngjarje si dhe kamionë me medikamente dhe ushqime.