Adoleshentët “braktisin” Facebook, sfida nga platformat e reja

Një kërkues britanik e ka deklaruar Facebook-un të ‘vdekur’ tek adoleshentët, ndonëse Facebook vazhdon të ketë disa qindra milionë përdorues. Por tani mund të thuhet se Facebook ka më shumë konkurentë. Studiuesi Daniel Miller në fund të vitit të shkuar shkruante në blogun e tij se Facebook jo vetëm po dështon, por është duke vdekur tek të rinjtë nga mosha 16 deri 18 vjeç. Miller vëzhgoi përdorimin e mediave sociale në një komunitet të vogël në Londër në vitin 2013. Projekti u financua nga Këshilli Europian për Kërkime. Miller zbuloi se tani adoleshentët preferojnë media të tjera sociale dhe jo Facebook. Ai pretendon se arsyeja është për faktin se Facebook “humbi veçantësinë” duke u bërë modë për të gjithë dhe madje edhe prindërit e fëmijëve janë rëgjistruar atje. Sidoqoftë adoleshentët kanë një profil në Facebook, për shkak se duan të qëndrojnë në kontakt me familjet e tyre.

Diversiteti i platformave

Studimi i Miller tregoi se të rinjtë janë duke u larguar nga Facebook në drejtim të katër platformave të tjera: Snapchat, WhatsApp, Twitter dhe Instagram. Këto platforma, të cilat janë të përqëndruara tek pajijsjet mobile, përdoren nga grupe miqsh, shkruan Miller. Aplikacioni me mesazhe fotografike, Snapchat, i lejon përdoruesve të dërgojnë fotografi, video dhe formate te tjera nga smartphonet e tyre. Miller tha se ky aplikacion është më popullori në komunitetin ku ai zhvilloi studimin e tij. Ai zbuloi gjithashtu se adoleshentët përdorin WhatsApp, që është një aplikacion për smartphone dhe të bën të mundur të shkëmbesh mesazhe me miqtë. Rrjeti i adoleshentëve në Twitter është më i gjerë, ndërsa në Instagram (i cili është në pronësi të Facebook) ata kanë edhe miq të huaj. Një raport për rrjetet sociale në Gjermani i bërë nga kompania BITKOM konfirmon se të rinjtë përdorin gjithnjë e më shumë mediat sociale. Të rinjtë nga mosha 14 deri 29 vjeç janë më shumë aktivë në Pinterest, Soundcloud dhe Tumblr . Studimi i BITKOM tregoi gjithashtu se të rinjtë përdorin më shpesh rrjetet sociale nga smartphonet e tyre, pra ata janë të dhënë më shumë pas mediave sociale në formën e aplikacioneve dhe jo Facebook, që mund të përdoret më mirë vetëm nga kompjuteri.

Facebook shumë larg nga “vdekja”

Të quash Facebook të vdekur mes adoleshentëve mund të jetë ekzagjërim i situatës, sepse ai përdoret ende nga shumë adoleshentë. Një studim i vitit 2012 në Amerikë tregonte se 94% e adoleshentëve të pyetur përdornin Facebook. Studimi i BITKOM konfirmoi të njëjtën situatë në Gjermani. “Në krahasim me studimin e vitit 2011, numri i përdoruesve të Facebook mes moshës 14 dhe 29 vjeç, është rritur në mënyrë të ndjeshme”, shkruan në një email për DW Andreas Streim, zëdhënës i BITOKOM. Vitin e shkuar 85% e të rinjve ishin përdorues të Facebook, ndërsa dy vjet më parë 71%. Facebook është duke dominuar edhe në popullatën e përgjithshme globale. Është platforma sociale më e përdorur në botë, me rreth 1 miliard përdorues. Por adoleshentët, pavarësisht se e kanë në listën e tyre të mediave sociale, nuk e venë atë në vendin e parë. “Pjesa më e madhe e tyre po mbyllin profilet. Unë mendoj se Facebook nuk është më platforma e komunikimit të tyre, mendoj se ka vdekur”, shkruan Miller në një email për DW.

Avancon përdorimi

Për Cedric, një 17 vjeçar, i cili jeton në një qytezë në afërsi të Këlnit në Gjermani “Facebook nuk është është i mirë, por edhe as i keq”. Ai e përdor platformën për të ndjekur faqet që i interesojnë, por edhe se çfarë bëjnë “like” miqtë e tij dhe çfarë videosh postojnë ata. “Ti ke Facebook sepse të gjithë e kanë një të tillë”, thotë Cedric. Ai planifikon evente me miqtë e tij në Facebook, por shumë rrallë poston diçka. “Për të kontaktuar me miqtë e mij, përdor më shumë whatsApp sepse është më i thjeshtë”, vazhdon Cedric, i cili ka një iPhone. Miller gjithashtu citoi se Snapchat dhe WhatsApp janë më të thjeshta në përdorim ndaj përdoren më shumë nga adoleshentët. Cedric e quajti WhatsApp si shumë “cool”. WhatsApp “ka më shumë mënyra për të kontaktuar me miqtë e tu “, shtoi ai. Ai pëlqen shumë edhe Instagram, pasi mund të përpunojë fotografi. Cedric na tha se prindërit e tij nuk kanë një profil në Facebook, por nëse do të kishin ai nuk do t’i bënte miq.

DW