“Hitleri vdiq në Brazil në moshën 95-vjeçare”

Mendohet se ka vrarë veten më 30 prill 1945 në një bunker të Berlinit pasi kuptoi që Gjermania kishte humbur Luftën e Dytë Botërore, por një libër i ri thotë se Adolf Hitleri u arratis nga bunkeri dhe vdiq në vitin 1984 në moshën 95-vjeçare, në një qytezë të vogël braziliane në kufi me Bolivinë. 

Për ta vërtetuar këtë gjë, autorja e librit publikon edhe një fotografi të një burri me një grua braziliane, por fytyra e burrit nuk duket aspak qartë. Gruaja në foto quhet Cutinga dhe sipas autores Simoni Renee Guerreiro Dias, Hitleri u lidh me të për të treguar se nuk urrente çdo person që nuk ishte i racës ariane.

Libri me titull “Hitleri në Brazil, jeta dhe vdekja e tij” thotë se Hitleri jetoi me emrin Adolf Leipzig në qytezën Nossa Senhora do Livramento dhe njihej mes banorëve si “plaku gjerman”.

Akademikët në Brazil e kanë konsideruar këtë teori si “krejt të pavlerë”. Candido Moreira Rodrigues, një profesor historie në Universitetin Federal të Mato Grosso, tha: “Të gjithë njësoj janë këta njerëz që i thonë vetes historianë dhe dalin me teorira se Hitleri ka jetuar në Amerikën Latine.”

Tre vite më parë, autorët Gerrard Williams e Simon Dunstan kanë publikuar një libër ku ngrenë teorinë se Hitleri ka jetuar në Argjentinë së bashku me të dashurën e tij Eva Braun, me të cilën pati dy vajza. Sipas tyre, Adolf Hitleri vdiq në vitin 1962, në moshën 73-vjeçare./ Top Channel