Prekazi refuzon klubet nga Shqipëria, vazhdon me Llamkosin

Futbollisti i dalluar, Arbër Prekazi, ka vazhduar kontratën me Llamkos Kosovën edhe për gjashtë muaj të tjerë, duke i hedhur poshtë spekulimet për transferimin e tij në ndonjë skuadër të Shqipërisë.

Llamkos Kosovës i kishte skaduar kontrata me Arbër Prekazin, posa kishte përfunduar pjesa e parë e kampionatit. Por, qendërmbrojtësi ka arritur marrëveshje me kampionin vjeshtor për ta vazhduar kontratën edhe për gjashtë muaj tjerë, duke i hedh poshtë kështu ofertat që i kishte marr nga disa ekipe tjera përfshirë këtu edhe disa skuadra nga Shqipëria.

“Kam vazhduar me Llamkosin edhe për gjashtë muaj tjerë. Kam krijuar shoqëri të mirë aty, atmosfera në klub është e mirë dhe gjithnjë ka atmosferë fantastike nga tifozët andaj jam i kënaqur që do të luaj edhe në pranverë për këtë skuadër”, tha për Arenën Prekazi.

“Kisha oferta edhe nga Shqipëria, por trajnerit Ismet Munishi ia kam lënë në dorë të menaxhoj me mua, të shohim pas përfundimit të kampionatit se ku mund të shkoj”, theksoi Prekazi, i cili beson se do ta festojë titullin e kampionit me klubin bardh e kaltër në fund të këtij sezoni. /Telegrafi/