Gani Geci pranon: E vrava Sandokanin në vetëmbrotje (VIDEO)

Ish-deputeti i LDD’së, Gani Geci ka mbajtur një konferencë për media para pak çastesh para zyrave të LDK’së.
Ai ka rikonfirmuar se është vrasësi i Abedin Rexhës-Sandokanit, por thotë se këtë e ka bërë në vetëmbrojtje.

Për shkak të këtij krimi, ai konfirmoi se nuk do të garoi në zgjedhjet e 8 qershorit për një ulëse të Parlamentit të Kosovës, porse këtë vend po ia lëshon vëllait të tij.

Deklaratat e tij vijnë pasi që policia bëri zhvarrosjen e eshtrave të Sandokanit. Geci tha që me veprimin e tij po ia lëshon udhën drejtësisë që ta bëjë punën e saj. “Unë tani po i dorëzohem drejtësisë, sepse ju e dini që SHIK’u ma mban qe 15 vjet në shpinë një vepër që e kam kryer në vetë-mbrojtje”, ka thënë Gani Geci.

Geci nuk ka pasur përgjigje se çka do të bëjë nëse LDK’ja nuk e pranon as atë e as vëllanë e tij. Ai ka thënë në këtë konferencë që kjo nuk mund të ndodh, pasi që LDK’ja ka deklaruar që i ka dyert e hapura.

Gani Geci ka folur edhe për rastin e gazetarit Milaim Zeka dhe biznesmenit Rrustem Rrulolli, të dy të akuzuar nga EULEX për zbulim të dëshmitarëve të mbrojtur në rastin e krimeve të luftës kundër “Grupit të Drenicës”.

Geci thotë që në këtë rast është përfshirë si i shantazhuar nga gazetari Milaim Zeka. Në fund të konferencës, Geci ka thënë që beson që LDK’ja do ti fitoj këto zgjedhje.