La Liga, titulli vendoset sot, Barcelona për jetë a vdekje me Atletikon

Do të luhet sot gjatë pasdites, takimi vendimtar që do të përcaktojë edhe fituesin e kampionatit spanjoll të futbollit. Barcelona do të presë në “Camp Nou” rivalët e Atletikos së Madridit. Për katalanasit, mundësia e vetme për të triumfuar është fitorja ndërsa skuadrës së Diego Simeones i mjafton vetëm një barazim për të regjistruar suksesin e parë pas shumë viteve. Favoritët sigurisht që mbeten vendasit, pasi kanë zhvilluar një sezon mjaft të dobët. Ata mund ta shohin këtë takim si një 90-minutësh ku mund të shfryjnë nervat. Gjithashtu, katalanasit nuk janë as nën presion pasi nuk kanë se çfarë të humbin. Do të jetë një përballje shumë e fortë duke njohur veçoritë e dy ekipeve. Atletiko pritet që të zhvillojë një lojë mbrojtëse dhe do të tentojë që të shfrytëzojë në maksimum rastet e shënimit.

Deklaratat përpara takimit

Tata Martino: “Parashikoj një takim mjaft të vështirë. Kundërshtarëve u mjafton edhe një barazim, ndaj mendoj se ata do të luajnë një futboll me tipare mbrojtëse. Kam ende paqartësi mbi formacionin duke qënë se disa lojtarë nuk janë në formën e tyre më të mirë fizike. Mendoj se gjithçka do të vendoset gjatë minutave të fundit. E ardhmja ime? Nuk mendoj se është koha e duhur për të diskutuar mbi këtë temë. Tani jam i fokusuar vetëm tek takimi që do të luajmë kundër Atletikos.”

Diego Simeone: “Nuk mendoj se ka nevojë që t’i përgatis lojtarët shpirtërisht. Puna e një trajneri është që të stërvis skuadrën dhe jo t’i motivojë atë. Futbollistët e mi dinë ta gjejnë vetë inspirimin e tyre. Ata e dinë shumë mirë se çfarë duhet të bëjmë. Ndeshja do të jetë një finale. Ne jemi më të favorizuar pasi na mjafton edhe një barazim, por kjo nuk do të thotë se ne do të mbyllemi në mbrojtje gjatë gjithë takimit. Do të luajmë me të njëjtat skema që kemi aplikuar gjatë gjithë sezonit. Pres një Barcelonë të frikshme duke qenë se kjo është një mundësi e artë për ta.

Leo Mesi: “Mendoj se kjo është ndeshja më e rëndësishme e sezonit. Kemi patur një vit mjaft të vështirë me plot zhgënjime. Kjo është një mundësi e veçantë për ne. Kemi mundësi që të vendosim fatin e kampionatit në shtëpinë tonë. Edhe në rast triumfi, gjërat nuk do të ndryshojnë. Shpresoj që të rikthehemi gjatë sezonit të ardhshëm.”

Miranda: “Pres shumë nga Diego Kosta. Ai ka zhvilluar një sezon brilant dhe ka qenë udhëheqësi ynë gjatë këtij viti. Edhe pse nuk është në gjendjen e tij më të mirë, unë kam besim se ai do të paraqitet mjaft mirë. Barcelona do të tentojë të hakmerret ndaj nesh. Kemi qenë një ‘mace e zezë’ për ta. Eliminimi nga çerekfinalet e Ligës së Kampionëve ishte i dhimbshëm. Besoj se katalanasit do të sulmojnë shumë pasi fitorja është opsioni i tyre i vetëm. Gjithsesi, Simeone ka deklaruar se ne do të luajmë normalisht dhe nuk do të strukemi në qendër të mbrojtjes. Do të jetë një takim me intensitet të lartë. Duhet të jemi të fortë si fizikisht ashtu edhe mendërisht. Shpresoj t’ia dalim.”