Arrin në 11 bilanci i viktimave nga përmbytjet, 15 mijë të evakuuar në Serbi

SARAJEVË, 17 maj /ATSH-AFP/  – Shtatë viktima të reja u zbuluan sot nga përmbytjet në Bosnje, duke e çuar në 11 bilancin e viktimave në këtë vend, ndërsa në Serbinë fqinje më shumë se 15 mijë persona janë evakuuar deri ditën e sotme.
“Në Doboj (veri), gjashtë trupa të pajetë u gjetën në zonën ku uji ishte tërhequr”, njoftoi Milorad Dodik, president i Republikës Srpska, entitet i serbëve të Bosnjës ku ndodhet Doboj.
Një tjetër viktimë u gjet në Samak (veri).
Në Bosnje, ashtu si edhe në Serbi, nuk është përjetuar një situatë e tillë me shira të dendur që prej 120 vitesh.
Me konstatimin e trupave të tjerë bilanci i të vdekurve arrin në 11 nga përmbytjet në Bosnje ku disa qytete dhe dhjetëra fshatra janë mbuluar nga uji që prej së mërkurës.
Dhjetëra mijëra persona janë bllokuar në banesat e tyre, ndërsa disa fshatra janë evakuuar plotësisht pas rrëshqitjes së tokës.