Gjendje e jashtëzakonshme në Serbi, të paktën dy viktima (VIDEO)

Shirat e rrëmbyeshëm që kanë goditur Serbinë 24 orët e fundit kanë përmbytur një pjesë të mirë të vendit, duke detyruar autoritetet që të shpallin emergjencën kombëtare.

Sipas medieve serbe, mësohet se një zjarrfikës 42-vjeçar humbi jetën të enjten në mëngjes gjatë një operacioni shpëtimi në lëminin Jasenica, i cili ka dalë nga shtrati i tij.

Më parë, një person që nuk pranoi të evakuohej nga shtëpia e tij në Beograd, vdiq, si pasojë e përmbytjeve të shkaktuara.

Situata vazhdon të jetë shumë e rëndë pasi lumenjtë e fryrë nga shirat e shumtë kanë dalë nga shtrati i tyre e rrezikojnë të marrin përpara ç’të gjejnë.

Autoritetet serbe kanë shpallur gjendjen e jashtëzakonshme në 5 qytetet dhe 16 komuna. Qyteti Valjeve në perëndim të vendit ndodhet në situatë më të vështirë.

Më shumë se 500 njerëz janë evokuar në pjesë të ndryshme të vendit, ndërsa operacionet vazhdojnë ende në zonat më të rrezikuara.

Qarkullimi hekurudhor është pezulluar në shumë linja, ndërsa në disa qytete janë mbyllur të gjithë shkollat.

Në një situatë mjaft kritike ndodhet edhe kryeqyteti i vendit, Beogradi, ku po vëzhgohet me kujdes niveli i lumenjve Danub dhe Sava.

Autoriteti shtetëror i meteorologjisë ka paralajmëruar se shiu do të vazhdojë gjatë gjithë ditës së enjte, por me më pak intensitet.