E çuditshme, Turkmenistani ka Ministri të Kuajve

Në Turkmenistan, në vendin e vetëm në botë që zyrtarisht ka Ministrinë e Kuajve, u mbajt Festa e Kalit gjatë të cilit janë shënuar manifestime në tërë vendin.

Në ceremoninë kryesore në Ashgabat morën pjesë zyrtarë të lartë të vendit, ndërsa presidenti Gurbanguli Berdimuhamedow demonstroi aftësitë e tij të kalërimit. Natyrisht, në këtë vend të çudive dhe ashiqare diktatorial, ai zuri vendin e parë, ndërsa të gjithë duhej të dëshmonin me duartrokitje “mahnitjen” e tyre.

Në ceremoni u organizua edhe gara e “Miss” kalit, ku u zgjodh kali më i bukur në vend. Atë çmimi e fitoi kali Korkmaz, ndërsa pronari i tij ka marrë për shpërblim një veturë luksoze .

Po ashtu, në të njëjtin konkurs është zgjedhur monumenti më i bukur me figurën e një kali dhe çilimi më i bukur me figurat e kalit, raporton Anadolu Agency, transmeton Telegrafi.

Telegrafi ka shkruar më herët se dentisti Gurbanguli Berdimuhamedow, njëjtë si paraardhësi i tij Saparmurat Niyazov, ka ndërtuar një tjetër kult të çuditshëm të personalitetit. P.sh. ia vuri vetes titullin e nderuar Arkadag, që do të thotë “Patron”. Fiksim i tij janë kuajt Akhal-Teke, që është kafsha kombëtare dhe emblema e Turkmenistanit. Ky budalla librin e tij “Fluturimi i kalit qiellor” e fillon madje me këto fjalë: “Nuk do të të quaj kalë, por do të të quaj vëlla, sepse je më i dashur se vëllai”.

Çudia më e madhe këtë herë është se në manifestimin e sivjetshëm kanë marrë pjesë mysafirë nga 41 shtete të botës. /Telegrafi/