Pesë skenarët për fatin e Ukrainës (Video)

Si do të përfundojë kriza e Ukrainës, me paqe apo me luftë? Pesë janë për ekspertët skenarët e mundshme të rrjedhës që do të marrin ngjarjet në rajonet e trazuara lindore të vendit.

Qeverisë së re në Kiev po i shterojnë alternativat e rivendosjes se kontrollit zonat lindore dhe ruajtjes se integritetit territorial. Godinat qeveritare dhe rajonet e policisë janë në duart e separatistëve. Përgjigja e Kievit ndaj kësaj mësymjeje ka qenë e paqëndrueshme dhe shumë hezituese. Çfarë mund të ndodhë më tej?

1. Hipoteza e parë është ajo e shembjes së paqes

Marrëveshja e Gjenevës ofroi atë që Barack Obama do ta cilësonte "një grimcë shprese".
John Kerry megjithatë u tregua i kujdesshëm në pohime pas negociatave: "Askush nga ne nuk doli nga kjo sallë me bindjen e plotë se kryem punë, duke qenë se gjithçka është vetëm në letër".
Detyra e implementimit të paktit iu ngarkua OSBE-së që ka dërguar 100 vëzhgues në rajon. Por, ata nuk zotërojnë fuqi zbatuese dhe për më tepër, kanë vështirësi të hyjnë në zonat e kontrolluara nga pro-rusët. Pushtuesit nuk e konsiderojnë veten si të jashtëligjshëm; mendojnë se janë në të drejtën e tyre. Arseny Yancenyuk u ofroi rajoneve të rebeluara autonomi më të madhe, por Rusia kërkon më shumë se kaq: ajo do garanci se Ukraina nuk do t`i bashkohet NATO-s dhe pretendon zgjedhje të drejtpërdrejta në këto zona për legjislativin dhe ekzekutivin. Njëri prej shteteve më të centralizuara të botës, kërkon decentralizim të thellë në derën ngjitur.

2.Qeveria ukrainase rimerr kontrollin e lindjes

Nga sa kemi parë javët e fundit, pak gjasa ka që kjo të ndodhë. Grupet pro-ruse kanë nën kontroll zyrat qeveritare nga Sloviansku në veri e deri në Mariupol, në detin Azov. në shumicën e rasteve, udhëhiqen nga "persona me uniforma të gjelbra" dhe janë sot praktikisht ata që kontrollojnë rajonet e Donyetckut dhe Luhanskut.

3. Lufte civile

Vladimir Putin e tha se Ukraina është në prag të luftës civile, por në fakt, nuk duket ashtu. Protestuesit pro-rus janë më tepër me dhjetëra, sesa me qindra dhe ka shumë pak ndjenja pro-Kievit në afishim. Nuk ka pasur as tubime masive të përkrahësve të Ukrainës e as përleshje nëpër rrugë. Duket qartë se janë të shumtë ata që preferojnë te mos përzihen. Shumica e popullsisë vazhdon jetën si normalisht, të shqetësuar më tepër për gjendjen e ekonomisë dhe zhvlerësimin e hrivnes.

4. Një pushtim i Rusisë

Si Putin, ashtu dhe ministri i tij i Jashtëm, Sergei Lavrov e kanë përsëritur vazhdimisht se Rusia nuk ka në plan të pushtojë apo aneksojë lindjen e Ukrainës, edhe pse në afërsi të kufirit janë të dislokuara 40.000 trupa të Moskës. Interesat e Rusisë për çdo rast janë të mbrojtur nga "njerëzit me jeshile", që po ia shkulin Kievit autoritetin mbi rajonet lindore. Por, nëse Qeveria ukrainase përpiqet të rivendose kontrollin me forcë, duke shtuar viktimat në radhët e protestuesve pro-rusë, atëherë Moska mund të ndryshojë qëndrim, sepse vazhdimisht ka premtuar të ndërhyjë nëse sulmohen bashkëkombasit rusë në Ukrainë.

5. Vazhdimi i status quo-s të rrëmujshme

Për shumë analistë, kjo është pikërisht ajo që mund të ndodhë; një vazhdimësi e ngërçit mes grupeve pro-Kievit dhe atyre pro-Moskës në lindje. Por vetë separatistët nuk duket të kenë aftësi qeverisëse. Shumë prej personave të maskuar në Donyetck janë adoleshentë, thotë CNN. Asnjë lider politik nuk ka dalë deri më tani në skenë si figura me të cilin Qeveria e Kievit apo OSBE-ja mund të negociojë për situatën /TCH/