Atletico Madridi kampion i Spanjës (VIDEO)

Atletico Madridi është kampion i Spanjës për sezonin 2013/2014. Los Rojiblancos morën rezultatin e nevojshëm përballë Barcelonës (1-1) në Camp Nou, i cili u mundësoi që ta përfundonin sezonin në krye të La Ligas.

Ishte një gjysmë e parë makthi për ekipin mysafir që humbi edhe Diego Costan edhe Arda Turanin si pasojë e lëndimeve, për më shumë Atletico pranoi edhe gol.

Fabregas dërgoi një top te Messi, i cili me gjoks e çoi në drejtim të Alexis Sanchez dhe kiliani realizoi me një gjysmë-vole (33’).

Porsa filloi gjysma e dytë, Koke dërgoi një top drejt David Villas, i cili e dridhi shtyllën e ish-skuadrës së tij.

Nuk kaloi shumë kohë dhe erdhi goli i barazimit. Gabi harkoi nga këndi dhe Diego Godin kërceu më lartë nga të gjithë për të shënuar (49’).

Të zgjedhurit e Diego Simeones bënë presion pas golit të shënuar, ndërkaq Messi realizoi nga pozita jashtë loje. Të dyja skuadrat patën raste deri në fund, mirëpo gola të tjerë nuk pati.

Atletico Madridi e mbyll edicionin 2013/2014 si kampion i Spanjës me 90 pikë, tri më shumë se Barcelona që nuk fitoi asgjë këtë sezon.

Ky është titulli i dhjetë i La Ligas në histori të Atleticos dhe i pari që nga sezoni 1995/1996.

Bardhekuqtë do ta kërkojnë edhe trofeun e Ligës së Kampionëve në finalen e 24 majit kundër Real Madridit./Telegrafi/