OLIGARKU / Poroshenko, “mbreti i çokollatës” kërkon Presidencën
Mark Franchetti Korrespondent i “Sunday Times” ne Moske I konsideruar një prej më të pasurve të Ukrainës, dhe një i mbijetuar i politikës së...
https://flurudha-portal.blogspot.com/2014/05/oligarku-poroshenko-mbreti-i-cokollates.html
Mark Franchetti
Korrespondent i “Sunday Times” ne Moske
I konsideruar një prej më të pasurve të Ukrainës, dhe një i mbijetuar i politikës së pabesë në këtë vend, Petro Poroshenko është mësuar të ketë sukses në një ambient armiqësor. Por “Mbreti i çokollatës”, siç është pagëzuar miliarderi i ëmbëlsirave është shumë pranë marrjes së postit politik më pak për t’u patur zili në botë: president i Ukrainës.
Njeriu që të gjithë e konsiderojnë fitues të sigurtë në zgjedhjet e të dielës së ardhshme, Poroshenko, i cili e ka ndërtuar pasurinë në kaosin e rrezikshëm që vendi i tij përjetoi në vitet e postkomunizmit, nëse do të arrijë të fitojë, do të përballet me një sfidë që bën të dridhen venat dhe kyçet: shpëtimi i Ukrainës. Me një rebelim të dhunshëm separatist në qytetet e Lindjes dhe një krize financiare të paprecedentë, presidenti miliarder do të ketë nevojë për të gjithë mprehtësinë e tij politike dhe financiare, nëse do të dojë që të shmangë zhytjen e vendit në një konflikt civil, apo të shkojë drejt një falimenti.
Sipas sondazheve të fundit, Poroshenko mund të triumfojë me 50% të votave. Julia Timoshenko, ish kryeministrja kontroverse dhe një prej aktoreve kryesore në skenën politike të vendit për më shumë se një dekadë, ka mbetur në nivelin 11%, një rezultat që mund të shënojë fundin e karrierës së saj politike. “Duket se Poroshenko do të jetë presidenti i ardhshëm i Ukrainës”, ka deklaruar një prej ish ortakëve të tij në biznes. “Ky është një rezultat i mirë, edhe duke marrë parasysh faktin që pas më shumë se 15 vitesh në politikë, Poroshenko nuk është një fytyrë e re, por në këtë moment ajo e presidentit të Ukrainës është detyra më e keqe e mundshme”.
Një element kyç për të ardhmen e vendit do të jetë mënyra se si Poroshenko – pasuria e të cilit vlerësohet 1.6 miliardë dollarë – do të rivendosë marrëdhëniet me Rusinë. Pas pushtimit të Krimesë dhe strategjisë së tensionit në Ukrainën lindore, nga fillimi i majit presienti rus Vladimir Putin ka nisur atë që shumë analistë e kanë quajtur një tërheqje taktike. Putini, popullariteti i të cilit është ngjitur në qiell pas blicit në Krime, u ka bërë thirrje separatistëve rusë në Ukrainën lindore që të shtyjnë referendumin për pavarësi nga Kievi.
Zgjedhjet farsë u zhvilluan gjithësesi, por nuk morën mbështetje zyrtare nga Kremlini. Për herë të parë madje, Putini e ka quajtur votimin e të dielës “një hap në drejtimin e duhur”. Deri tani, Kremlini ka dërguar mesazhe kundërthënës për mënyrën si do i presë rezultatet, por burime të brendshëm kanë bërë të ditur se Moska mund të pranojë, ndonëse e rezervuar, një fitore të mundshme të Poroshenkos, duke hapur kështu rrugën për bisedime në të ardhmen, në lidhje me fatin e rajoneve filoruse në lindje të Ukrainës. Ministri i jashtëm rus, Sergei Lavrov deklaroi javën që kaloi se e pranon që Poroshenko “nuk është një fashist”, një term që zakonisht e ka përdorur për të përshkruar anëtarët e qeverisë së përkohshme në Kiev. “Jemi gati për dialog me këdo”, ka shtuar më tej Lavrovi.
Pershtatur ne shqip nga bota.al